काठमाडौं २५ माघ । प्रमुख विपक्षी दल एमालेले स्थानीय तहको निर्वाचन घोषणाको स्वागत गरेको छ । मन्त्रिपरिषद्को सोमबारको बैठकले २०७९/ ३० वैशाखमा एकै चरणमा निर्वाचन सम्पन्न गर्ने गरी निर्वाचन गर्ने निर्णय लिएपछि एमालेले त्यस्तो प्रतिक्रिया जनाएको हो । स्थानीय तहको निर्वाचनको मिति घोषणाका लागि एमालेले सरकारमाथि लगातार दबाब बनाउँदै आएको थियो।
चुनाव घोषणा भए पनि सत्तारुढ पाँचदलीय गठबन्धनभित्रैको दाउपेचका कारण जुनसुकै वेला व्यवधान खडा हुन सक्ने भएकाले सतर्कता अपनाउनुपर्ने अवस्था रहेको एमालेको टिप्पणी छ । ‘स्थानीय तहको निर्वाचन घोषणालाई सकारात्मक रूपमा लिएको एमाले उपमहासचिव तथा निर्वाचन विभागका प्रमुख विष्णु रिमालले जानकारी दिएका छन।

स्थानीय निर्वाचन घोषणाका लागि एमालेले एक सातादेखि सडकबाटै दबाब दिन सुरु गरेको थियो । दबाबका लागि एमालेले भ्रातृ संगठनहरूलाई देशभर सडकमा उतारेको थियो । त्यस्तै, केन्द्रीय सचिवालयको पछिल्लो बैठकबाट चुनाव घोषणाका लागि दबाब दिने उद्देश्यले सातवटै प्रदेशमा कार्यकर्ता भेला गर्ने निर्णय समेत गरेको थियो ।

नेकपा एमालेले सम्पूर्ण पार्टीपंक्तिलाई चुनावको तयारीका लागि परिचालन हुन आव्हान समेत गरेको छ।