काठमाडौ भदौ ३१ । नेपाल राष्ट्रबैंकले यस वर्ष दसैँ सुरु हुन केहि समयअगाडिदेखि नै नयाँ नोट वितरण गर्ने भएको छ । काठमाडौं उपत्यकाभित्र वाणिज्य बैंक र तिनका शाखामार्फत यही ४ असोजबाट नयाँ नोट सटही सुविधा दिइने भएको छ ।
उपत्यकाबाहिरका लागि भने राष्ट्र बैंकको प्रेस कार्यालय र वाणिज्य बैंकबीचको समन्वयमा नोट सटहीको समय तोकिने भएको हो ।राष्ट्र बैंकले प्रतिव्यक्ति १८ हजार पाँच सय रुपैयाँसम्म सटही सुविधा दिने भएको हो । ५, १०, २०, ५० र १०० का प्रतिबन्डलसम्म सटही हुने गरी यो सुविधा दिने भएको हो । करिब १० देखि १२ अर्ब रुपैयाँका नयाँ नोट सटही हुने अनुमान राष्ट्र बैंकको छ ।‘क’ वर्गका बैंकहरुले समेत दशैंका लागि नयाँ नोट वितरण गर्नेछन् ।
धेरै जसो बैंकहरुमा नयाँ नोट पुगिसकेको राष्ट्र बैकले जनाएको छ। केही विकास बैंक र फाइनान्स कम्पनीहरु समेतले नयाँ नोट बितरणका लागि लगिसकेका छन् ।हरेक वर्ष दशैंमा नयाँ नोट वितरण गर्दै आएको राष्ट्र बैंकले गत वर्ष कोभिडका कारण नयाँ नोट वितरण गरेको थिएन । यस वर्ष संक्रमण निकै घटेपछि राष्ट्र बैंकले नयाँ नोट वितरण गर्न लागेको हो । केही वर्ष पहिलेसम्म दशैंका लागि नयाँ नोट लिन राष्ट्र बैंकमा राति देखि नै सर्वसाधारणहरु लाइन लाग्ने गरेका थिए ।तर बैंकहरुमा पठाउने र क्षेत्रीय कार्यालयहरु समेतले वितरण गर्ने भएकाले विगतको जस्तो ठूलो भीडभाड कम हुने राष्ट्र बैंक मुद्रा ब्यवस्थापन बिभागका कार्यकारी निर्देशक रेवतीप्रसाद नेपालले बताए ।