चौतारा साँगाचोकगढी नगरपालिकाले शुरु गरेको “जनता सँग मेयर” कार्यक्रम प्रभावकारी बन्दै गएको छ । नगरपालिकाको प्रत्येक बस्तिमा पुगेर जनता संग प्रत्यक्ष छलफल गरि नयाँ कार्यक्रम तय गर्ने उद्येश्यले गत सालबाट नै सो कार्यक्रम शुरु गरेको थियो ।

नगरपालिकामा हुने बिकास निर्माणका कामहरु संचालन गर्न प्रत्यक्ष नगरबासिकै घर दैलोमा पुगेर आबश्यकता पहिचान गरि बिकासका कार्यक्रम संचालन गर्ने अभियान शुरु गरेको नगर प्रमुखका स्वकिय सचिब रोहित शर्माले जानकारी दिए ।

सोहि अभियान अनुसार शनिबार नगरपािलका वडा नं.९ इर्खुमा सो कार्यक्रम सम्पन्न भएको छ । नगरबासीको गुनासो र आबश्यकता बुझ्न इर्खु पुगेका नगर प्रमुख अमान सिं तामाङले कसैलाई पनि भेदभाव नगरि बजेट तथा कार्यक्रमहरु संचालन गरेको अवगत गराउदै अब पनि पालिका बासिको आबश्यकता हेरेर कार्यक्रमहरु तय गर्ने बताए । उनले भने, “नयाँ शिराबाट अगाडि बढनको लागि गाँउगाँउमा पुगेर योजना छनोट गर्ने कार्यको शुरुवाति भएको थियो यसको प्रभावकारीता बढदै गएपछि यो कार्यक्रमले निरन्तरता पाएको हो ।

सो कार्यक्रममा नरसिंह पातला देवी मन्दिर निमार्णको लागि नगरप्रमुख तामाङले रु ३ लाख बजेट समेत बिनियोजन गरेका छन् । मन्दिर परिसरमा भएको सो कार्यक्रममा उपस्थित सबै स्थानीयको माग मन्दिर निर्माण रहको र प्रभावकारी समेत सोही हुने हुँदा सो मन्दिरको लागि बजेट दिने घोषणा गरेको समेत तामाङले जानकारी दिए । अब निवेदन बोकेर नगरपािलका पुग्नेहरुको योजना पास हुने छैन, कुन योजना कति आबश्यक छ आफुनै बस्ति बस्तिमा नै पुगेर बास्तबिक र अति आबश्यकका योजना छनोट गरि बजेट बिनियोजन गरिने समेत उनले बताए ।

नगरपालिका वडा नं ९ का वडाध्यक्ष तिर्थबहादुर श्रेष्ठको अध्यक्षतामा सम्पन्न कार्यक्रममा माओवादी केन्द्रका जिल्ला कमिटि सदस्य तथा खेलकुद संयोजक उजार सीं तामाङ, नगर कार्यपालिका सदस्य तथा माओवादी केन्द्रका नगर कमिटि सदस्य सागर परियार, सोही वडाका पार्टी वडा कमिटि अध्यक्ष रामकृष्ण दंगाल लगायत अतिथिको उपस्थिति रहेको थियो ।