काठमाडौं।संविधानसभाका अध्यक्ष एवं नेकपा (एमाले)का उपाध्यक्ष सुवासचन्द्र नेम्वाङको अन्त्येष्टि आज बिहीबार शवयात्रासहित पशुपति आर्यघाटमा राजकीय सम्मानका साथ हुँदैछ।

उनको शवयात्रामा सहभागी भई अन्तिम श्रद्धाञ्जली अपर्णका लागि बिहान ११ बजे निजी सवारीसाधन हुने शङ्खपार्क, धुम्बाराही र सवारीसाधन नहुनेहरू गौशाला (वडा प्रहरी कार्यालय अगाडि) पुग्न एमालेले अनुरोध गरेको छ।

उनको निजी निवास बालुवाटार–शिक्षण अस्पताल, महाराजगञ्ज–नारायणगोपाल चोक–धुम्बाराही–चाबहिल–गौशाला हुँदै पशुपति आर्यघाटसम्म शबयात्रा गरिने छ ।

परिवारजनका अनुसार नेम्वाङकाे अन्त्येष्टि लिम्बू संस्कार अनुसार गर्न लागिएकाे छ । दिवंगत नेम्वाङका भाइ आनन्द नेम्वाङका अनुसार लिम्बू परम्परामा अन्तिम संस्कार दुई किसिमले हुन्छ । कसैले शव जमिनमा गाडेर त कसैले घाटमा जलाएर अन्तिम संस्कार गर्ने चलन रहेकाे उनले बताए ।

नेम्वाङकाे हकमा भने शव जलाएर अन्त्येष्टि गरिने उनले बताए । ‘हाम्राे (लिम्बूहरूकाे) आफ्नै धार्मिक प्रक्रिया हुन्छ ।फेदाङ्बा (पुरोहित)ले विधिअनुसार अन्तिम संस्कार गराउने चलन छ । कसैले जमिनमा गाड्ने गर्दछन् भने केही समुदायले जलाउने गर्छ । हाम्राे हकमा जलाउने निर्णय गरेका छाैँ । बागमती नदी (पशुपति आर्यघाट)मा लगेर जलाउने कार्यक्रम राखेका छौँ’, उनले भने, ‘सरकारले राजकीय सम्मान दिने भनेकाे छ । त्यसमा पनि हामी सहभागी हुन्छाैँ ।’

अन्तिम संस्कारपछि महिलाको हकमा तीन दिनमा र पुरुषका हकमा चार दिनमै चोखिने चलन भए पनि ४५ दिनमा चाेखिने चलन पनि रहेकाे उनले बताए । ‘कति दिनमा चाेखिने कार्यक्रम राख्ने भनेर सल्लाह गरिरहेका छाैँ’, आनन्दले भने ।

बुबाकाे अन्तिम संस्कारमा सहभागी हुन नेम्वाङका दुई छाेरा विदेशबाट हिजै काठमाडाैं आइसकेका छन् । छाेराहरू आउन समय लागेका कारण निधन भएकाे दुई दिनपछि अन्तिम संस्कार गरिन लागेकाे हाे ।उनको अन्त्येष्टिको दिन आज सरकारले मुलुकभर शोक बिदा दिएको छ।