काठमाडौं, भदौ १० । नेकपा एकिकृत समाजवादी पार्टीले दल दर्ताको मान्यता पाएको भोलि पल्टै पहिलो पत्रकार सम्मेलन गरेको छ। पत्रकार सम्मेलनमा सो पार्टीका अध्यक्ष माधव नेपालले आफुलाई उचाल्ने आफू निकटका नेताहरुले धोका दिएको आरोप लगाउनु भएको छ ।

अध्यक्ष नेपालको यो आरोप उपाध्यक्ष भीम रावल, अष्टलक्ष्मी शाक्य, युवराज ज्ञवाली, उपसमहासचिव घनश्याम भुसाल, सचिव गोकर्ण बिष्ट, भीम आचार्य, सुरेन्द्र पाण्डे, रघुजी पन्त र अमृतकुमार बोहोरामाथि लक्षित देखिन्थ्यो। सुरुदेखि नै माधव नेपालको साथमा रहनुभएका यी १० प्रभावशाली नेताहरुले पार्टी बिभाजनमा असहमति राख्दै एमालेमै रहने निर्णय गर्नुभएको थियो ।

‘केपी ओलीले प्रशंशा गर्नेलाई मात्रै च्याप्नु भयो । पार्टी सिथिल भयो । सिथिल मात्रै होइन मृत प्राय भयो, यो देखेपछि हामीले विद्रोहको विगुल फुक्ने काम गर्यौ । लामो यात्रामा जाँदा कोही बिचैमा थाक्दा रहेछन,’ निर्वाचन आयोगबाट पार्टी दर्ताको प्रमाणपत्र लिएपछि आज पहिलो पत्रकार सम्मेलन गर्दै अध्यक्ष नेपालले एमाले मृत भयो, विद्रोह गरौँ भन्‍नेहरुले धोका दिएको बताउनु भयो।

नेपालले पार्टीका विद्रोेही नेता कार्यकर्ताकै साथ सहयोगले अगाडि बढेको पनि बताउनु भयो । थाक्नेहरु घटिरहन्छन् ,अगाडि बढ्नेहरु लक्ष्य हाँसिल गर्न खोज्ने, देशलाई अघि बढाउन खोज्नेहरु अघि बढिरहन्छन्,’ नेपालले भन्नुभयो । ‘हामीले २०७७ चैतमा विद्रोहको विगुल फुकेका थियौँ । देशभरका कार्यकर्ताको भावनाको कदर गर्नतर्फ लाग्यौँ ।’ उपयुुक्त मौकाको पर्खाइमा भएकाले नयाँ दल दर्ता गर्न सफल भएको अध्यक्ष नेपालले बताउनु भयो।