काठमाडौँ । नेपाली कांग्रेसका ६९ विभागमध्ये ५५ वटा गठन भएका छन् । गठन भएका विभागमध्ये पनि अधिकांशले पूर्णता पाइसकेका छैनन् ।

नेपाली कांग्रेसको विधानमा बढीमा ५१ जना सदस्य रहने गरी विभाग गठन गर्ने व्यवस्था छ । यसमध्ये धेरै विभाग गठन भएको नेपाली कांग्रेसको दाबी छ ।नेपाली कांग्रेसका मुख्य सचिव कृष्णप्रसाद पौडेलका अनुसार अन्य पनि गठन गर्ने तयारी भइरहेको छ । यसरी गठन भएका विभागले के काम गरिरहेका छन् भन्ने प्रश्न स्वाभाविक रूपमा उब्जिएको छ ।

पार्टीको विधानले विभाग गठनको अधिकार सभापतिलाई दिएको छ । विधानले महाधिवेशन भएको ६ महिनाभित्र विभाग गठन गर्नुपर्ने नीतिगत व्यवस्था गरेको छ । तर, तोकिएको समयमा विभाग गठन नभए पनि ८० प्रतिशत विभाग गठनको काम भइसकेको दाबी मुख्य सचिव पौडेलको छ ।

यी विभागमा संयोजकसहित ५१ सदस्य रहनैपर्ने भए पनि प्रत्येक विभागमा संयोजकसहित १० जनामात्र सदस्य तोकिएका छन् । ३७ विभागमा मात्र सचिव तोक्ने काम भएको छ ।