काठमाडौ । नेपाल राष्ट्र बैंकले ४ वटा वाणिज्य बैँक र २ वटा विकास बैँकलाई कारबाही गरेको छ । यसरी कुल ६ बैँकलाई चालु आर्थिक वर्ष २०८०/८१ को तेस्रो त्रैमासमा केन्द्रिय बैंकको सुपरिवेक्षण विभागले कारबाही गरेको हो ।

कारवाहीमा पर्नेमा लक्ष्मी सनराइज बैंक, कुमारी बैंक, प्राइम कमर्सियल बैंक, नेपाल इन्भेस्टमेन्ट मेगा बैंक, लुम्बिनी विकास बैंक र एक्सल डेभलपमेन्ट बैंक रहेको राष्ट्र बैंकले जनाएको छ ।

यिनीहरूलाई राष्ट्र बैंकले कारवाही गर्नुको कारण भने फरकफरक रहेको छ ।

लक्ष्मी सनराइज बैंक

राष्ट्र बैंकले लक्ष्मी सनराइज (साविकको लक्ष्मी बैंक) को संस्थापक सेयरधनी राजेन्द्रकुमार खेतानलाई १० लाख रुपैयाँ नगद जरिवाना गराएको छ । बैंकको १ प्रतिशतभन्दा बढी सेयर धारण गरेका संस्थापक सेयरधनी खेतानले सोही बैंकका ऋणी पंकज झुनझुनवालालाई प्रवाह गरेको १२ करोड कर्जामध्ये ११ करोड ४४ लाख आफ्नो खातामा ट्रान्सफर गरी/गराइ उपयोग गरेको देखिएको राष्ट्र बैंकले जनाएको छ ।

उक्त कर्जाको ब्याजसमेत खेतानको खाताबाट ट्रान्सफर गरी/गराई भुक्तानी भएकाले राष्ट्र बैंकबाट बैंक तथा वित्तीय संस्थालाई जारी एकीकृत निर्देशनमा भएको व्यवस्था उल्लंघन भएकाले नेपाल राष्ट्र बैंक ऐन, २०५८ को दफा १०० को उपदफा (२) बमोजिम राजेन्द्रकुमार खेतानलाई १० लाख जरिवाना गरिएको राष्ट्र बैंकले जनाएको छ ।