ललितपुर । प्रमुख प्रतिपक्ष नेकपा (एमाले)को पहिलो विधान महाधिवेशन आजबाट सुरु गोदवारीस्थित सनराइज हलमा शुरु हुँदैछ ।देशैभरका ६ हजार भन्दाबढी नेता कार्यकर्ता सहभागी हुने उक्त महाधिवेशनको अध्यक्ष केपी शर्मा ओलीले सवा १२ बजे उद्घाटन गर्ने कार्यक्रम छ ।
महाधिवेशनमा भाग लिन सम्मेलनस्थलमा नेता कार्यकर्ता पुग्न थालिसकेका छन् । तर, एमालेको इतिहासमा पहिलोपटक हुन लागेको यो विधान महाधिवेशनमा भने एमाले बनाउने नेताहरु नै हुने छैनन् ।
अध्यक्ष ओलीले पार्टीभित्र मच्चाएको स्वेच्छाचारी र गुटगत आचरणकै कारण मुख्य नेताहरु माधवकुमार नेपाल, झलनाथ खनाल र वामदेव गौतम यो महाधिवेशनमा सहभागी हुँदैनन् ।
माधव र झलनाथले ओलीको प्रवृत्तिको विद्रोह गर्दै नयाँ पार्टी नेकपा (एकीकृत समाजवादी) दर्ता गरेर केन्द्र र सरकारमा सरकार बनाइसकेको अवस्था छ । एमालेमा उपाध्यक्ष रहेका बामदेव दुई हप्ताअघि मात्र राजीनामा दिएर बाहिरिएका छन् ।
एमालेका बनाउने मुख्य नेताहरु बाहिरिएको धुमिल परिस्थितिमा ओली विधान महाधिवेशन गर्नतिर लागेका छन् । ओली पार्टीको नवौं महाविधेशनबाट अध्यक्ष बनेका हुन् । १०औं महाधिवेशन आगामी मंसिरमा गर्ने घोषणा भइसकेको छ ।
एमालेले बोक्दै आइरहेको स्व. मदन भण्डारीको जनताको बहुदलीय जनवाद (जबज) सिद्धान्तको समकालीन योजनाकार बेदुराम भुसाल जस्ता नेताहरु पनि ओलीसँग छैनन् । एमालेमै रहेका जबजका अर्का अख्यानकार घनश्याम भुसालले पार्टीको केन्द्रीय समितिको बैठकमा ओलीले आफ्नो प्रतिवेदन राखेको बाला ‘अधुरो’ र ‘धुलो मिसिएको’ भनेर फरक मत दर्ज गरिसकेका छन् ।
महाधिवेशनमा अध्यक्ष ओलीले राजनीतिक प्रतिवेदन, महासचिव ईश्वर पोखरेलले सांगठनिक र उपमहासचिव विष्णु पौडेलले विधान संशोधनसम्बन्धी दस्तावेज पेश गर्दैछन् ।
त्यही दस्तावेजमाथि प्रतिनिधिहरुले समूहगत छलफल गरी समूहका नेताले रिपोर्टिङ गर्नेछन् । यो विधान महाधिवेशनले आगामी महाधिवेशनबाट नेतृत्व चयन गर्ने नयाँ बाटो तय गर्ने विश्वास गरिएको छ ।
कार्यक्रम हुने सनराइज हललाई निकै सिंगारिएको छ । यसको सम्पूर्ण व्यवस्थापनको जिम्मा माओवादी केन्द्र छाडेर एमालेमा प्रवेश गरेका बादललाई दिइएको छ ।